Amatora ararimbanyije mu gihugu cya Guinea Equatorial aho ishyaka riri ku butegetsi rya Democratic Party of Equatorial ariryo riri imbere mu majwi y’agateganyo yashyizwe hanze kuri uyu wa mbere, rikaba ariryo ryatsinze amatora ku kigero cya 99% yaba mu mu y’Umukuru w’Igihugu, abagize Inteko Ishinga Amategeko ndetse n’abayobozi b’inzego z’ibanze.
Ni amatora yabaye ku Cyumweru tariki 20 Ugushyingo. Iki gihugu gito gikungahaye kuri peteroli, kimaze imyaka 43 kiyoborwa na Teodoro Obiang Nguema Mbasogo w’imyaka 80.
Akaba ariwe muyobozi umaze igihe kinini ku butegetsi ku Isi. Guinée équatoriale imaze kugira abakuru b’ibihugu babiri gusa kuva yabona ubwigenge mu 1968, aho uwa mbere ari nyirarume wa Obiang witwaga Francisco Macias Nguema. Yakuweho na Obiang amuhiritse ku butegetsi mu 1979.
Kuri iyi nshuro, abakandida babiri batavuga rumwe n’ubutegetsi bagerageje gushaka uko bakura Obiang ku butegetsi biyamamariza umwanya w’Umukuru w’Igihugu gusa ntibyabahiriye.
Abo ni Buenaventura Monsuy Asumu umaze kwiyamamaza inshuro eshanu na Andrés Esono Ondo wari wiyamamaje ku nshuro ye ya mbere.
Amajwi y’agateganyo agaragaza ko ishyaka riri ku butegetsi Democratic Party of Equatorial Guinea (PDGE) ndetse n’ayo byishyize hamwe bifite amajwi 67.012 mu 67.196 amaze kubarurwa. Abantu barenga ibihumbi 400 nibo biyandikishije nk’abatora muri miliyoni 1,5 z’abaturage b’iki gihugu
